ركن المرأة شباب على طول امنياتى جرائد وصحف

السبت، سبتمبر 18، 2010

وحشتونى و ياللا نضحك



وحشتونى  .. وحشتونى .. وحشتونى
بقالى كتير قوى قوى مش ضحكت معاكم
قولت كفايه بقى وأجى أرطب على قلبكم وأرطب على قلبى معاكوا
معلش سامحونى الفتره اللى فاتت كانت فتره عصيبه جدا للغايه بالنسبه ليا
وبالمناسبه دى باشكر كل اللى دعالى من قلبه علشان تمر الازمه بسلام
وبشكر الحب الجميل اللى وقفت جنبى فى ازمتى
بشكركم كلكم يا أجمل صحبه وأجمل أصدقاء
وبشكر كل اللى سأل عنى وحب يطمن عليا
ربنا ما يحرمنى منكم أبدا
وكل سنه وانتوا طيبين بمناسبه بدء العام الدراسى ... 
خلاص أيام العز والهنااااااااا خلصت ورجعنا للقرف من تانى
 مدارس ودروس  وياااااااااااااااااى
 حاجه مزعجه ومتعبه ومرهقه وسامحونى لو غبت عليكم
لكن مقدرش ابعد عنكم  ابدااااااااااا
كفايه بقى رغى كتيررررررر وتعالوا نضحك مع بعض

 بيقولك


- مره واحد صعيدى سافر فرنسا فعاكس واحد قلتله سوفاج قالها لا سوهااج

- أيوه يا بابا ماما في القسم , ليه يا أبني ؟؟
عشان قضيه صفيه علشان اختي زهره وأزواجها الخمسه
ليه؟
لأنها جابت لنا العار ولما شافتني قالت لي حرمت يا بابا أنا كنت ملكه في المنفي اتعرفت علي امرأه في ورطه وقالت لي عفوا مازلت انسه وكانت عايشه في مملكه الجبل وعاشت أجمل قصه حب وقالت لي عايزه أتجوز من كابتن عفت لكن عرفت سر اختفاء ...سعيد مهران من جريده... نص أنا ونص هو
و جوز ماما كان عايش بره الدنيا وكان نايم علي ريش نعام لأنه كان همام شيخ العرب و هو ... أغلي من حياتي
 
- مرة فار ماشى مع خطيبته فى الغابة وفجاة لاقى الاسد الامريكي فحب يعمل
راجل قدام خطيبته فراح للاسد قاله: انت يا حيوان
 الاسد رد قاله: انت بتشتمنى انا ؟؟
 رد الفار وقاله: ايوة بقلك انت و مشى الفار وراح وصل خطيبته
لبيتها وهو راجع قابله الاسد قالوا : انت كنت بتشتمنى انا يا فار؟؟ قالوا:
... لا والله دا انت ملك الغابة هو حد ي...قدر يشتمك؟؟
أنا بس كنت بعمل شويتين كدا قدام البت .. انا اسف وهات راسك
ابوسها طلع الفار على راسوا عشان يبوسها فلقى خطيبتوا معديه فقال للاسد: هتسكت ولا ادوس على راس امك دلوقتي ؟
 
 
- واحد راح للدكتور و قاله "كل منطقة في جسمي بتوجعني يا دكتور " كشف الدكتور عليه مفيش حاجة
سأله الدكتور تاني "فين المنطقة اللي بتوجعك"، قاله "هنا و هنا و هنا" و هو
بيشاور بصباعه في كل مكان و قاله "بص يا دكتور حتي راسك بتوجعني" فاكتشف
الدكتور إن صباع المريض مكسور

  - واحد غبي بيشتغل نجار ... وهوا شغال وقع منه مسمار ع الارض ... راح باصصله وقاله تعاال , ماردش عليه , قاله يامسمار ربنا يهديك تعال ... ماردش ... راح رامي عليه باقي علبه المسامير وقالهم ... هاتولي الكلب ده

- واحد بيقول لابوه مش هروح المدرسه تانى , قاله ليه ياحبيبي ؟
الولد قاله المدرس بيقول عليا غبى ومابفهمش ...
 ابوه قاله هاجى معاك واشوف الموضوع , سأل المدرس انت بتقول على ابنى
غبى ليه ان شاء الله ؟
 قاله هثبتلك انه غبى , راح المدرس قال للواد انزل شوفني فى مكتب
المدير وتعال
 راح الولد وجه وقاله انتا مش تحت يا استاذ راح ابوه قاله والله... ؟
 طب انزل شوفه فى الحوش
 
- واحد فشار اوي بيحكي لاحفاده ويقولهم : زمان وانا شباب كنت في الغابه ... طلعلي اسد كبير اوي ومفترس اوي قالي يا اما اكلك يا اغتصبك ... قالوله ها ياجدو وعملت ايه ؟ قالهم خليته ياكلني طبعا ... انتو مفكرين الشرف لعبه ؟


اتمنى تكونوا ضحكتوا من قلبكم

ذى ما أنا ضحكت من قلبى

وبادعوكم لزياره


والدعوه دى باقدمها لكل عشاق تعلم

وصفات الطبخ من أشهر الشيفات

 
  اقعدوا بالعافيه


أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

27 التعليقات:

Ramy يقول...

حمد الله ع السلامه

الحب الجميل دى صحبة واجب من يومها

مش أسكندرانية (: يعنى مية مية (:

(:(:

ايوة ضحكنا بجد

و بأهديلك أغنية وحشتونى لوردة (:

http://www.youtube.com/watch?v=Ww979-Fl1t8

جايدا العزيزي يقول...

هههههههههههه

والله انت اللى وحشتينا اكتر

خرجتينى من المود

لمابحس بالحزن بجيلك اقوام

حبة نكت

قوليلى بتجيبى الحاجات الحلوة دى منين

تحياتى

أتنين حبيبين يقول...

(:(:

(:(:

(:(:

أتنين حبيبين يقول...

وانتى كمان وحشتينى وحشتينى وحشتينى الى مالا نهاااااااااااااايه وكنتى مفتقداكى وحساكى حزينه

بس الحمد لله رجعت زى الاول منوره وهتفضلى منوره على طول

Haytham Alsayes يقول...

ههههههههههههههههههههههه
بجد نكت جميلة
وفعلا ضحكت خاصة علي نقطة الفار والغبي وابوه اللي اغبي منه


حمد الله علي السلامة

تحياتي

أتنين حبيبين يقول...

ربنا يسعدك زى ما بتسعدى كل الناس اللى بتحبك يا حبيبتى

نكت لذيذه اووووووووووووووووووووووى

أنا - الريس يقول...

حمد الله علي السلامه يحجه
والله مكنت اعرف انك في ازمه
الحمد لله ربنا سلم وكل خير

خدي انتي دي

* محشش قاعد يشوف مباراة ريال مدريد .. سمع المذيع يقول فاول لصالح رونالدو .. قال : تصدقوا اول مرة اعرف ان اسم رونالدو الاول صالح .


مره واحد كان بيطلع نكت على الصعيده راح يعمل عمره ووقف قدا م الكعبه وقال يارب معنتش هقول نكت على الصعيده تانى سامحنى يارب راح جه واحد صعيدى وقف جمب الراجل وقله يابلدينا هيا القبله منين رد الراجل وقال شفت يارب هما اللى بيستفزونى ( علي فكرة يقال ان اصل عيلتي من الصعيد )

مره واحد راح لشيخ وقله ياشيخ وانا بصلى فى الصحراء وعدىمن قدامى اسد صلاتى مقبوله رد الشيخ وقله لو فضلت على وضؤك

أنا - الريس يقول...
أزال المؤلف هذا التعليق.
غير معرف يقول...

ايه يا بنتى دا .. عيب عليكى والله دا أنتى أختى حبيبتى ربنا يخليكى ليا يارب
وهو أنا عملت إيه بس .....
أنا عيطت بس
ههههههههههههه
دا انتى مرمورة صاحبة الابتسامة الحلوة
ربنا ما يحرمنيش منك ابدااااا
ويفرح قلبك دايما
رامى .... شكرا كتير على كلامك الجميل ... ربنا يخليك يارب
ويسعدك ويناولك اللى فى بالك
قول يارب
أنتم كلكم مية مية يا أجمل صُحبه عرفتها فى حياتى
بحبـــــــــك يا مرمورتى

غير معرف يقول...

مره واحد راح لشيخ وقله ياشيخ وانا بصلى فى الصحراء وعده من قدامى اسد صلاتى مقبوله رد الشيخ وقله لو فضلت على وضؤك
ههههههههههههههه
ايه يا ريس دا
جامده جدا
ههههههههههههههههههه

غير معرف يقول...

واحد غبي بيشتغل نجار ... وهوا شغال وقع منه مسمار ع الارض ... راح باصصله وقاله تعاال , ماردش عليه , قاله يامسمار ربنا يهديك تعال ... ماردش ... راح رامي عليه باقي علبه المسامير وقالهم ... هاتولي الكلب ده
ههههههههههههه
رهيبه يامرمر
غبى منه فيه
هههههههههههه
أنتى بجد مشكله بس مشكله داميلة ددا
كله جميل
يسلم اختيارك يا مرمورتى
دمتى بابتسامه متفارق حياتك ابدا

شمس النهار يقول...

حمد الله علي السلامة

وان شاء الله ماتغبيش عن مدونتك تاني

وخفي شويه علي الصعايده

مش كفايه مسلسلات رمضان

تحياتي

شهرزاد يقول...

حبيبتي مرمورتي
المكان من غيرك وحش
تركتينا في دنيا الهم والحزن والاشتياق وبعدت عنا الضحكات
بس ابتسامات اليوم ساخنه
ربنا يسعدك
وحمدالله على السلامه

خواطر شابة يقول...

حمد الله على السلامة عزيزتي
انت فيه بينك وبين الصعايدة ثار بايت ولا ايه? ههه
أضحك الله سنك عزيزتي ودمت بكل الود

باحث عن حب يقول...

مره واحد صعيدى سافر فرنسا فعاكس واحد قلتله سوفاج قالها لا سوهااج

ماشى

واحد غبي بيشتغل نجار ... وهوا شغال وقع منه مسمار ع الارض ... راح باصصله وقاله تعاال , ماردش عليه , قاله يامسمار ربنا يهديك تعال ... ماردش ... راح رامي عليه باقي علبه المسامير وقالهم ... هاتولي الكلب ده

دى بقه اللى جامده طحن

بردوا كده
اول نكته طيب خليها فى النص


كل سنه وانتى طيبه
يا مررم
ويفرج كربك يارب

ديالا يقول...

الله عليكي كان نفسي اضحك بجد

بجد مدونتك رائعه بجد

Noha Saleh يقول...

حمدالله على سلامتك
ويارب تكون الازمة عدت على خير ومايكونش فيه ازمات تانى
انا ضحكت جدا وفى اكتر من واحدة عجبونى اوى

Unknown يقول...

السلام عليكم
حمدا لله علي سلامتك وان شاء الله تكوني بخير والازمة تكون عدت بسلام

حاجة عجيبة لا الطلبة مرتاحين ببدء الدراسة ولا احنا المدرسين مرتاحين برضو نصحي من الفجر ونروح المدرسة ونشرح للطلاب اللي هما اصلا لو قعدت اشرح سنة محدش هيحاول يفهم حاجة لانه مش عاوز يفهم بس بجد ربنا يعنكم وينجحكم ان شاء الله وتوصلوا للي انتم عاوزينه في حياتكم

والف شكر علي النكت بس حاولي تكتر عن الصعايدة علشان معايا مدرس صعيدي بيموت في النكت اللي عليهم

دمتي متالقة ومتميزة دائما

عمدة كفر المظاليم يقول...

السلام عليكم
بجد عجبوني
أول واحدة أجمل واحدة
والنجار برده جميلة
بس لومسطول تبقى أحلى
متشكر جدا
تحياتي

gogo!sf يقول...

انا يا اختى ضحكت من قلبى برغم انى مش ليه نفس اضحك بس بجد ضحكتينى جدا انتى والحب الجميل والله موتتنى من الضحك انهارده

وان شاء الله نشوف بعض على خير ونتعرف على بعض اكتر

وبعتذر طبعا عشان الموضوع السخيف اللى انا نزلته انهارده واعزعج ناس كتير بجد انا اسفه ليكى يا حبيبتى جدا

بس سيبك انتى شويه نوكت تحفه

انتى معندكيش هنا تعليقات مش للنشر ليه بقى ههههههههههههه

بشكرك على زيارتك اللى بجد اسعدت قلبى

Tears يقول...

جميلة اوى النكت و كنت فى حاجة اليها فعلا

شكرا لمجهودك :))

Mahmoud Ahmed يقول...

هههههههههه
^_^
حلوين
^_^

همسات وبحــ الحياه ــر يقول...

ههههههههههه
انت واحشانى كتييييير
انا باجى هنا عشان اضحك واشيل الاكتئاب اللى عندى

عمرو يسرى يقول...

طبعا التعليق اللى فات كان غلاسه
ماتزعليش
المهم حمدالله على السلامه
نكت جميله كالعادى

♥♥ سكنـــ روحي ــت♥♥ يقول...

عودة سعيدة
فك الله كربك وابعد عنك الالم

ضحكاتك رااااااااائعة

اسعدك الله

جنّي يقول...

السلام عليكم

الله يعافيكي ..

والله ضحكنا بجد في وقت ضن علينا بالضحك ..

تحيتي

ساسو يقول...

بجد ضحكت من قلبي
ربي يخليكي
وترسمي البسمه في عيونا كمان وكمان

القالب صمم بواسطة
 نرحب بكل الأفكار والمقترحات التجارية