ركن المرأة شباب على طول امنياتى جرائد وصحف

الخميس، يونيو 24، 2010

خمسين جنيه

طبعا كلنا عارفين الشباب الروش اليومين دول مش بيفضل
في جيبهم مليم احمر اخر اليوم
( طبعا زمن الملاليم خلص ) 
كمان مش بيفضل في رصيدهم قرش واحد حتي يدي بيه ميسد كول للمزه
( طبعا القرش مالهوش لازمه برضه )
اخويا  قرر انه يطلب من ماما فلوس علشان يشحن ولكن
للاسف بابا حالف علي ماما بالطلاق لو ادتله فلوس او حتي حولتله رصيد
يعمل ايه ... يعمل ايه   !!!
فكر و قرر انه يتصل بتيته علشان يطلب منها فلوس وكان يوم مطلعتلوش شمس
ودار بينهم الحوار ده
اخويا  : إزيك يا سيتى.
تيته : بنتى .. إيه بنتى دى يا قليل الأدب .
اخويا : يا ستى بقولك ازيك يا ستيييى .
تيته : أنت بتزعق ليه يا واد أنت ..  أنا بافتكر بتقول بنتى .
اخويا : بتفتكرى إيه !! هو أنتى يا ستي حتى بتفتكرى إسمك .
تيته : جسمك .. ماله جسمى يا قليل الأدب .
اخويا : يا ستى إرحمينى شويه بقي وشيلى الزلط اللى فى ودانك .
تيته : قدامك !؟ هو إيه اللى قدامى يا واد أنت .
اخويا : يوووووووووه يادى النيله .
تيته : البليله .. أه البليله حلوه والله.. دا حتى أنا نفسي في طبق بليله باللبن كده يا واد وعليها شوية مكسرات وكده يعنى .
اخويا : يا حول الله يا رب هو حد جاب سيرة البليله يا ناس .
تيته : القلقاس !؟ أه بأحب القلقاس أهو كله نعمة ربنا .
اخويا : يا ستى ابوس ايديكي أرحميني أنا لا جيبت سيرة قلقاس ولا أناناس .
تيته : لأ لأ لأ عيب يا بنى ..عيب لما تجيب فى سيرة الناس .
اخويا : يا ستى هو أنا جيبت في سيرة حد .
تيته : أه يوم الحد كان إمبارح بس والنبى يا بنى ما أنا فاكره النهارده إيه!!؟
 يكونش النهاردة الجمعه يا واد .
اخويا : لا يا ستى النهارده الخميس .
تيته : البوليس!! وعايز منك أيه البوليس إنت عملت إيه يا منيل على عينك؟
اخويا : يييييه بقولك إيه يا ستى نفضى ودانك وطرطقيهم كده وإسمعينى .
تيته : رضعينى !! أرضعك إيه ياواد أما إنك قليل الأدب صحيح .
اخويا : يا ستى أنا إتفطمت من زمان الحمد لله بس عايز منك قرشين كده سلف .
تيته : علف !! إنت بتربى بهايم يا واد ؟؟
اخويا : يا ستى بقولك سلف !! سلفينى خمسين جنيه عايز أشحن التليفون .
تيته : كومبيليزون !! كومبيليزون إيه يا للى مش متربى .
اخويا : يا ستى حرام عليكى الرحمة حلوة برضه أبوس ايد اللى خلفوكى
عايز خمسين جنيه سلف علشان أشحن .
تيته : أشتم !! وكمان عايز تشتم يا قليل الأدب .
اخويا : بقى كده يا ستى طب ماشى خدي عندك بقا !! بقولك إيه يا ستى .
تيته : وظيفتى .. وظيفة إيه يا بنى أنا طالعه علي المعاش من زمان .
اخويا : رمان إنتى عايزه يا ستى تاكلى رمان .
تيته : أه نفسي في السمان .. هو فيه سمان دلوقتى يا بنى من بعد أنفلونزا الطيور .
اخويا : أه العبور !! أه ده كان سنة تلاته وسبعين .
تيته : سامعين ؟؟ سامعين إيه خير الله إما إجعله خير هو فيه حاجه .
اخويا : بتقولي ايه يا ستى ..عايزة قهوة سادة .
تيته : عياده ..عايز تودينى العيادة ليه يا بنى هو أنا عيانه .
اخويا : صقعانه .. صقعانه ليه بس يا ستى دا حتى الجو النهاردة حر .
تيته : كفالله الشر !! شر إيه يا بنى اللى بتقول عليه ده .
اخويا : بقولك إحنا على البررررر .
تيته : أه يابنى منا عارفه الخروف ليه فرو .. وبيبقي كمان تخين .
اخويا : أه إبنك حسين !!..ماله إبنك حسين .
تيته : العجل سمين !! أه هانجيب إن شاء الله في العيد عجل ندبحه ولازم يكون سمين .
اخويا : إيه يا ستي بتقولي ايه .. أسفين .. طب أسفين ليه !!
تيته : عايز خمسين جنيه !! طب مش تقول كده من الأول هو أنت مكسوف منى يا واد ههههههههه .
اخويا : ياااااااااااااااااااااااه أخيرآ يا ستى الحمد لله .. هاتى بقى .
تيته : أجيب إيه ؟
اخويا : هاتى الخمسين جنيه !!
تيته : تحسين بيه .. تحسين بيه مين يا واد .
اخويا : يالهووووووووووووووووووووووووى


 
اقولكوا ايه الطم ولا تلطموا انتم!!!
بلاش الطم أنا
ههههههه

أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

22 التعليقات:

Ramy يقول...

ههههههههههههههههههههه

انا لومكانه هبيع التليفون واجيب سماعة لستى

و ابقى اخد فلوس التليفون منها بعدين

كده ارحم ولا ايييييييية

جامدة يا جماعة

hadeir يقول...

ههههههههههههههههه
والله لو مكانه كان زمانى اتشليت

طب ما يروحلها البيت ويكتبلها فى ورقه الللى هو عاوزه

ويريح نفسه D:

ولا انتى ايه رأيك

بس بجد البوست تحفهD:

أتنين حبيبين يقول...

السلام عليكم

هههههههههههههههه

وربنا انتم دمكم زى العثل والثكر كمان

ربنا يخلى تيته يارب

ربنا يعزك زى ما فرحتينى وضحكتينى بكتابتك الروعه

دمتى بكل الخير
توتا

خواطر شابة يقول...

ياقلبه ده عنده صبر ايوب انا اللي بقرأ اتقطع نفسي فمابالك باللي بيسمع وبيرد
تحياتي وودي

mrmr يقول...

اهلا رامى
اقتراح جيدويبقى بكده استريحنا من تعب الاعصاب
شكرا لك
نورتنى

mrmr يقول...

مرحبا هدير
وهذا ايضا اقتراح جيد بس التليفون اسرع مش كده ولا ايه ...
شكرا ليكى يا قمر
شرفتنى

mrmr يقول...

اهلا توتا
يارب يخلكى ويبارك فيكى
ويارب كل اللى عنده ماما وتيته ربنا يخليهم ويبارك فيهم ويدليهم الصحه
والعافيه وميحرمش حد منهم
قولى يارب
مرسى يا قمر

mrmr يقول...

خواطر
حبيبه قلبى سلامتك يا حبى من قطع النفس
لكن هو غاوى بقى علشان مصلحته
تقولى ايه
دامت زياراتك ليا بحب
نورتينى

لــــ زهــــــراء ــــولا يقول...

هههههههههههههههههههه دا زمانه ضغطه اترفع...والحكاية هتدخل في اكتر من الخمسين جنية

ههههههههههههه
لولا

mrmr يقول...

لولا
اهلا بيكى يا حبى
ياريت جات يا حبيبتى على ارتفاع الضغط
وتعقد يشد فى شعره لغايه ما بقى زلابطه خاااالص
الواد مبقاش نافع خلاص
نورتى ياغاليه

Haytham Alsayes يقول...

هههههههههههههههههههههههه

دة زمانه اتشل واو انتحر من تيتة
لا حاجة رخمة بجد
بس انتي اسولبك الكوميدى جامد ما شاء الله
اهو برده يخرجنا من جو الكأبة اللي احنا فيه

تحياتي

mrmr يقول...

Haytham Alsayes
اهلا بيك ياراجل يا طيب
لا اطمئن لسه ما وصلش لدرجه الانتحار الحمد لله فيه نفس
نورتنى ودامت زيارتك ليا

حاجات جوايا يقول...

هههههههههههههههههههههههههه
جميلة جداااااا
انت عسولة يا مرمر
ومدوناتك جميلة ما شاء الله
لسه جاية من امنياتى دلوقت
قريت سندريلا وست الحسن
رجعتينا لايام زمااااااان
واسلوبك جميل اوى ما شاء الله

ربنا يوفقك يا قمر

تحياتى

أنا - الريس يقول...

ههخخخخخ
فكرتني بمسرحية كانت عندي في الابتدائي كان فيها النص التاني من الحوار ..
بس الله يرحمك يا ستي
تحياتي

mrmr يقول...

حاجات جوايا
يا مراحب يا مراحب
نورتى يا قمر
هو فى اجمل من ايااااام زمااااان
اللى كان عم ايوب يبعت الشغاله خديجه ويدها قرش صاغ
تدفع ايجار الشقه وتجيت اربعه ارطال للحمه وطمعه فى الباقى وطفشت
ههههههههههههههه
تسلمى ياجميل ومتحرمش من زيارتك ليا ابدا

mrmr يقول...

اهلا بيك يا ريس
مدونتى زادت نور بوجودك
ربنا ميحرمنى منك ومن تعليقاتك

أبو فارس يقول...

ههههههههههههه
حلوه تسلم ايدك
نتظر المزيد
دمتي في حفظ الله
تحياتي

mrmr يقول...

ابو فارس
يا مراحب يا مراحب
نورت وشرفت مدونتى
دمت فى حب وسعاده ولك منى كل تقديرى واحترامى

نفسى تفرح بيا يارب(الشهاب) يقول...

خخخخخخخخخخخخخخخخخخخخخخخخخخ
الناس الكبيره دى بركه فى البيت
والله
والواحد من غيرهم ملهوش لزوم
بس بدل ما تتعب له ودانه
يروح لها احسن ولا اقولك
يرهن التليفون
ويريح باله
ده باله
طويل
قوى قوى
قوى
بس
جامده
يا مرمر

باحث عن حب يقول...

هههههههههههههههه
ربنا يخلى الجده يارب
جميله جدا جدا

mrmr يقول...

اهلا يا محمووود
حمد الله بالسلامه
ايه الغيبه دى انت ما صدقت ياسيد تاخذ الاجازه كده ومش نشوفك .
انا اتعودت تبقى انت اولتعليق ولا ايه يا بلدياتى .
طبعا يا حوده الناس الكبيره بركه واللى مالهوش خير فى اهله مالهوش خير فى اى حد تانى
وبعد كده الراجل مستعجل لسه ح يتعب وينزل ويروحلها استقرب يعمل ايه طيب ولما يرهن التليفون يبقى مالهوش عازه الشحن
مش معايا انت ولا ايه !!!
ربنا يبارك فيك وكل اللى ليه تيته ربنا يخلي ليهم
مرسى ليك يا محمود وابقى مش تغيب تانى
ربنا يفرح قلبك ويكون معاك

sky rose يقول...

هههههههههههههههههه دا اخينا ده شكله نفسه طوووووووووويل اوى
كان الله فعونه

تسلمى يا قمر ع النكته

القالب صمم بواسطة
 نرحب بكل الأفكار والمقترحات التجارية